Светската тенисерка број 1, Арина Сабаленка, денеска се пласираше во третото коло на Вимблдон во женска конкуренција откако ја победи Американката Мекартни Кеслер со 2:0 во сетови 6:1 и 7:6 (9) во меч кој траеше еден час и 39 минути.

Сабаленка во следната фаза на грен слем турнирот ќе игра против Јелена Остапенко од Летонија, која ја победи Хрватката Антонија Ружиќ со 6:2 и 6:0.

Јапонката Наоми Осака исто така се пласираше во третото коло на Вимблдон откако ја победи Анастасија Гасанова со 6-3, 6-2 во второто коло. Следна противничка на Осака ќе биде Дарија Касаткина од Австралија.

Мананчаја Савангкаев од Тајланд, Чехинката Каролина Мухова и Американката Клер Лиу се пласираа во третото коло на Вимблдон.

Савангкаев направи уште едно изненадување на турнирот откако ја совлада Алиша Паркс од САД со 7:5 и 6:0 и за пласман во осминафиналето ќе игра против 10 носителка, Мухова.

Американката Коко Гоф многу потешко од очекувањата славеше против Солана Сиера од Аргентина со 6:3, 3:6 и 7:6 (7) по два часа и девет минути игра.

Гоф налета на силен отпор од Сиера која имаше одлична можност да дојде до голем триумф, откако во тај-брејкот на третиот сет имаше водство од 7:4. Но, американската тенисерка не дозволи сензација, и со серија од шест поени го освои тај-брејкот со 10:7 и дојде до победата.

Во следното коло Гоф ќе игра против нејзината сонародничка Клер Лиу која со 7:5 и 6:3 ја совлада Зејнеп Сонмез од Турција.