Денеска во руската амбасада во Скопје се одржа гласањето на референдумот за измените на Уставот на Русија, што потенцијално би можеле да му дозволат на претседателот Владимир Путин да остане на власт уште 12 години.

Право на глас на референдумот имаат околу 110 милиони луѓе, а во Амбасадата во Скопје можат да гласаат сите повремени и постојани државјани на Русија.

Доколку се одобрат уставните измени, се отвора патот тој да се кандидира повторно кога неговиот тековен мандат истекува во 2024 година, и повторно во 2030 година.

Според сегашните правила, на Путин му е забрането да бара трет последователен шестгодишен мандат. На референдумот не е потребен минимален одѕив за да биде валиден.

За време на гласањето во руската амбасада во Скопје, уште на самиот влез им се мери температура на гласачите, а најстрого се почитуваат и сите останати мерки за претпазливост и заштита од Ковид-19, како носење на заштитна маска и одржување на потребното растојание.