Руски пожарникари спасиле повреден був од врани
Пожарникарите често знаат покрај со пожари да спасуваат и животни заглавени на несекојдневни места, а најчест пример за тоа е мачка на дрво. Но, во рускиот град Смоленск тоа бил многу посериозен случај. Був со повредено крило бил пронајден како лежи пред портите на противпожарната станица во понеделникот наутро, а повредената птица ја колвале врани, велат властите, пренесува Би-Би-Си.
Пожарникарите ја виделе и ја спасиле повредената птица, внесувајќи ја на топло и давајќи и храна. Уралскиот був потоа бил однесен на ветеринар за дополнителна нега. Бувот се очекува да биде испратен во центарот за рехабилитација и реинтродукција на диви птици, соопшти службата за итни случаи на Смоленск.
Во интервју за руските државни медиуми, прес-службеничката Наталија Арбузова опиша како пожарникарите во западниот руски град ја спасиле птицата кога била забележана во 10:00 часот.
„Бувот лежеше неподвижен со повредено крило, а враните го колваа. Кога го виделе пожарникарите, притрчале на помош и ги избркале враните, а потоа го нахраниле““, рече таа.
Се очекува птицата добро да закрепне, но ќе остане кај ветеринарот додека не биде испратена во центарот за рехабилитација, додаде таа.