Поранешниот градоначалник на Њујорк, Руди Џулијани, денеска постигна спогодба со двe членки на изборни одбори во државата Џорџија, кои го тужеа за клевета и бараа отштета од 150 милиони долари, објави „Си-ен-ен“, повикувајќи се на судски документ.

Џулијани требаше да оди на судење во случајот, што го соочи со губење на неговиот имот на Флорида, каде што тврди дека постојано живее, како и на вредни работи кои ги поседува, како неколкуте шампионски прстени од безбол-тимот „Њујорк Јенкис“.

Џулијани беше во спор со двете службенички, Руби Фримен и Шеј Мос, околу тоа дали неговиот стан од 3,5 милиони долари во Флорида е негова примарна резиденција и дали може да биде ослободен од наплата на отштета.

Фримен и Мос веќе добија голем број од највредните работи на Џулијани на суд, вклучувајќи го неговиот стан на Менхетен вреден шест милиони долари, повеќе од десет луксузни часовници, мебел и колекционерски предмети за бејзбол.

Сепак, во последните месеци тие не успеаја да соберат некои од тие предмети, и покрај повеќекратните судски наредби Џулијани да ги предаде предметите.

„Последните четири години беа вистински кошмар. Се боревме да ги исчистиме нашите имиња, да си ја вратиме репутацијата и да докажеме дека не сме направиле ништо лошо. Денеска е направен голем чекор на нашиот пат. Постигнавме договор и сега можеме да продолжиме со нашите животи. Се договоривме да му дозволиме на господинот Џулијани да го задржи својот имот во замена за компензација и неговото ветување дека никогаш повеќе нема да не клевети“, изјавија Фримен и Мос.

Џулијани ги обвини двете жени по име и презиме, за вмешаност во наводни нерегуларности и измами за време на изборите во 2020 година, а тие поднесоа тужба против него за овие клевети.

Тие тврдеа дека нивниот углед бил сериозно нарушен со изјавите на Џулијани, а судот подоцна пресуди дека тие би можеле да бараат отштета за клевета.