Во опожарената кула „Вјесник“ во Загреб по три месеци започнаа подготвителни работи за отстранувањето на облакодерот, потврди денеска државниот секретар на Министерството за просторно планирање, градежништво и државен имот, Тончи Главиниќ, и најави дека работата ќе се одвива во фази, пишува Индекс.хр.

Багери и припадници на хрватската армија пристигнаа во „Вјесник“, и во најкраток можен рок можат да го отстранат целиот мебел од хрватскиот парламент што беше складиран таму. Утрово во Министерството за просторно планирање, градежништво и државен имот се одржа координативен состанок, на кој присуствуваа претставници на Градот Загреб, заедно со изведувачот и стручниот надзор. Тие разговараа за отстранување на 8.000 тони градежен отпад во моментот кога ќе започне процесот на отстранување, но и за регулирање на сообраќајот со оглед на состојбата на градилиштето, рече Главиниќ.

„Во овој момент се вршат истраги во кулата на 15-от кат, односно се земаат примероци од бетон и арматура. Од безбедносни причини, на тој кат се поставени и 12 потпори. Верувам дека резултатите од истрагата ќе ги добиеме во следните два или три дена“, рече тој.

Наскоро се очекува поставување на оградата на градилиштето и испорака на градежните контејнери.

Во договорот се наведува дека проектот може да се изведува во неколку фази, а изведувачот ќе одлучи колку ќе има. Секоја фаза од проектот мора да помине контрола кога станува збор за механичка отпорност, стабилност на почвата и околните згради во непосредна близина на „Вјесник“.

Главиниќ истакна дека методот на отстранување ќе го одреди проектантот. Тој очекува дека проектот за првата фаза ќе биде примен многу наскоро, а потоа ќе се разговара за методот на отстранување.

„За да разговараме за тоа, треба да ги добиеме резултатите од истражувањето што моментално се спроведува на 15-тиот кат, во врска со примероците од бетон и арматура“, истакна државниот секретар.

На прашањето колку луѓе ќе работат на градилиштето, тој одговори дека моментално има 10 до 15 работници, а нивниот вкупен број ќе зависи од понатамошните фази. Исто така, изведувачот ќе процени дали ќе му биде потребна помош од надворешни компании.

Во договорт со фирмата „Еурко“ кој е потпишан минатата недела, „Вјесник“ треба да се отстрани во рок од 90 дена.

Пожарот во „Вјесник“ стигна на суд во Хрватска: двајцата матуранти се соочуваат со казна до 10 години затвор