Рецепт за кремаст спанаќ во бешамел сос: Францускиот прелив му дава посебен шмек
Направете лесен ручек со спанаќ во бешамел сос, а може да биде и посен ако млекото го замените со овесно, а путерот со маргарин.
Препорачано
Спанаќот е здрав зеленчук што одлично оди со многу намирници, а може да се сервира и свеж, варен или печен. Постојат различни рецепти за спанаќ и не се знае кој е повкусен, а денес ви предлагаме да го подготвите со бешамел сос. Овој познат француски сос се користи наместо запршка и му дава посебен вкус на јадењето, а може да биде и посен, само путерот заменете го со маргарин и обичното млеко со посна варијанта.
Состојки:
– 250 грама спанаќ
– 250 мл млеко
– 20 грама путер
– 1 лажица брашно
– ¼ лажичка морско оревче
– ¼ лажичка бибер
– ½ лажичка сол
Подготовка:
Спанаќот кратко обарете го, па добро исцедете го и исечкајте го. Во тава растопете го путерот, пропржете го брашното, а потоа додајте млеко. Гответе додека не се згусне, со постојано мешање и на крајот додајте сол, бибер и морско оревче, па промешајте. Додајте го спанаќот и мешајте уште 5 минути, па тргнете го од шпорет.
