Парламентот на Јужна Африка повторно го избра Сирил Рамафоса за претседател на земјата. Тоа е втор негов претседателски мандат.

„За“ Рамафоса гласаа 283 пратеници, а 44 гласале за лидерот на опозициската партија Борци за економска слобода, Џулиус Малема.

Претходно партијата Демократски сојуз најави дека ќе гласа за Рамафоса во согласност со договорот со Африканскиот национален конгрес за формирање на влада на единство.

Во својот победнички говор, Рамафоса ја поздрави новата коалиција и рече дека гласачите очекуваат од водачите „да дејствуваат и да работат заедно за доброто на сите во нашата земја“.

Претходно, беше постигнат договор по неколкунеделните шпекулации за тоа со кого ќе биде партнер АНЦ откако го загуби своето парламентарно мнозинство за првпат по 30 години на изборите минатиот месец.

Таа доби 40% од гласовите, додека ДА беше втора со 22%.

Генералниот секретар на АНЦ Фикиле Мбалула го нарече коалицискиот договор „извонреден чекор“.

Тоа значеше дека Рамафоса – кој го замени Џејкоб Зума како претседател и лидер на АНЦ по жестоката борба за власт во 2018 година – може да ја задржи власта.

Следниот чекор е Рамафоса да додели позиции во кабинетот, во кој ќе бидат вклучени членови на ДА.

Aнкетите покажуваат дека многу Јужноафриканци сакаат оваа невидена голема коалиција да успее.