Радовиќ по освоената Суперкуп титула: Ваква убавина од мечеви нема никаде во светот
Ракометарите на Еурофарм Пелистер ја одбранија титулата во Суперкупот на Македонија, откако ја добија драмата против лутиот ривал Вардар 1961 со 23:22 (12:12).
Пресметката која се одигра во салата „Билјанини извори“ во Охрид понуди многу пресврти, промени во водството и атрактивен ракомет, а на крајот славеа „зелено-белите“ од Битола.
Е. Пелистер имаше голема поддршка од своите навивачи на трибините и за тоа им се заблагодарија играчите на тренерот Ларс Валтер.
– Ова беше еден врвен меч и доста тешка за играње. Како што се и сите други мечеви со Вардар. Најважно е што не се предадовме додека губевме, се боревме и успеавме да дојдеме до една неверојатна победа. Ова е голем триумф за самодоверба за понатаму. Беше многу тешко да се игра во оваа атмосфера која беше неверојатна. Убавина е да се играат вакви мечеви, вакво нешто нема никаде во светот – рече црногорското десно крило на Е. Пелистер, Мирко Радовиќ.
Веќе в среда пелистерци имаат нови обврски, ќе го играат заостанатиот натпревар од второто коло на групата „Б“ на Суперлигата против Голден Арт.