Рускиот претседател Владимир Путин изјави дека советските инвазии на Унгарија и Чехословачка биле погрешни. Говорејќи на форум во источна Русија, тој рече дека не е во ред да се прави нешто во надворешната политика што им штети на интересите на другите луѓе, пренесува Би-Би-Си.

Неговите забелешки доаѓаат додека руските трупи продолжуваат со борбите во Украина. Советскиот Сојуз ја нападнал Унгарија во 1956 година и Чехословачка во 1968 година по масовните протести и барањата за поголеми слободи.

Еден модератор го прашал путин како ќе одговори на оние кои велат дека Советскиот Сојуз се однесувал како колонијална сила кога испратил тенкови во Прага во 1968 година и Будимпешта во 1956 година.

Путин рече: „Одамна признавме дека тој дел од советската политика е погрешен и само доведе до тензии во односите. Не смее да се прави ништо во надворешната политика што е во директна спротивност со интересите на другите народи“.

Путин вели дека земјите на Запад, првенствено САД, сега ја прават истата грешка како Советите тогаш.

„Тие вршат притисок врз нивните сојузници, таканаречените партнери. Тие немаат пријатели. Тие имаат само интереси. Тоа е продолжение на добро познатата британска формула“, рече тој.

Коментарите на Путин за активностите на Советскиот Сојуз во Унгарија и Чехословачка се чини дека се во спротивност со ставовите на некои од неговиот близок круг.

Во август, учебник по историја напишан од еден од советниците на Путин, Владимир Медински, тврдел дека Унгарската револуција од 1956 година е фашистичко востание организирано од Западот и рекол дека повлекувањето на советските трупи од Унгарија во 1990 година било грешка.

Унгарските политичари и историчари го критикувале учебникот. Зилард Деметер, директорот на литературниот музеј Петофи, рече дека „нехуманите диктатури сепак ќе бидат нехумани и диктатури, дури и ако некој почне да ги прикажува во позитивно светло“.

Унгарскиот министер за надворешни работи Петер Сијарто коментира: „Има прашања во унгарската историја за кои нема ни да започнеме дебата со никого. Револуционерите од 1956 година се нашите херои“.