Првиот човек на Кјелце : Вардар го сака Зорман
Роберто Гарсија Парондо по освојувањето на титулата во ЛШ си заминува од Вардар, а клубот уште сега ја почна потрагата по неговата замена.
Главен фаворит за нов предводник на „црвено-црните“ е Словенецот, Урош Зорман кој мометно работи како помошник на Веселин Вујовиќ со словенечката репрезентација, и во Кјелце кај Талант Душебаев.
Оваа информација ја потврди и ракометарот на Вардар, Сташ Скубе за словенечките медиуми.
– Парондо не би сакал негов наследник да биде тренер од Балканот или од Скандинавија, тој смета дека е најдобро да се задржи сегашниот систем на игра, шпанскиот. А токму шпанскиот систем не е непознаница за Урош Зорман. Тој 15 години беше дел од овој систем и го знае ракометот во малиот прст. Знам дека би сакал да започне самостојна тренерска кариера и мислам дека Вардар би бил идеален тим за него. Ракометарите на Вардар го почитуваат и сигурно топло ќе го пречекаат. Се надевам дека ќе успее да се договори – изјави Скубе за „Дело“..
Потврда дека Зорман е во нотесот на раководството на Вардар, дојде и од првиот човек на полскиот тим, Бертус Сервас.
– Информацијата за интересот на Вардар за Урош Зорман ме изненади. Секако, неговото евентуално заминување за нас ќе биде проблем, ќе мораме брзо да најдеме друго решение. Но, сфаќам дека ова е голема шанса за Урош, да седне на клупата на новиот европски првак и нема да му стојам на патот доколку сака да замине Тој секогаш ќе има максимален респект во Кјелце, сакаме да остане и ќе се обидеме да го убедиме во тоа – изјави претседателот на Кјелце за полските медиуми.