Директорот на Царинската управа, Ѓоко Танасоски, утрово изјави дека стоковата размена меѓу државите се одвива без проблеми по строго утврдените правила. Тој вели дека во моментов секој зголемен увоз е добредојден.

Танасоски вели и дека периодов е забележан зголемен извоз на кондиторски производи што според неговите проценки е добро за економијата на државата.

Тој прецизира дека веднаш по прогласувањето на вонредната состојба и претходно со воведувањето на рестриктивните мерки Царинската управа заедно со министерствата за економија и за финансии и Државниот пазарен инспекторат направиле анализа на увозот на сите неопходни продукти за кои за одреден дел има забрана за извоз, а на другиот дел е дозволен слободен извоз за да нема штета кај компаниите.