Основното јавно обвинителство Тетово соопшти дека повело постапка против 48-годишен жител на градот, кој е осомничен за кривично дело – Посредување при вршење проституција од член 191 став 2 од Кривичниот законик.

Станува збор за макрото кој минатата недела самиот пријавил во полиција дека 23-годишна девојка, која во мотел се занимавала со проституција, се заканува дека ќе скокне од прозорецот на мотелот.

Полицајци ја спречија девојката да се самоповреди, а макрото беше уапсен.

„Осомничениот делото го вршел во неколку наврати во последните два месеци, обезбедувајќи клиенти за 23-годишна косовска државјанка сместена во неговиот мотел. Таа сексуалните услуги ги наплаќала, а поголемиот дел од заработката му го давала на осомничениот“, велат од Обвинителството.

По предлог на јавниот обвинител на осомничениот му е определена мерка притвор, додека жртвата е сместена во транзитен центар за странци до завршување на постапката.