Досегашните студии што се занимаваа со ефектите од коронавирусот на здравјето на луѓето, сугерираат дека инфекцијата може зад себе да остави фатални последици – од губење на сетилата, до оштетување на срцето и белите дробови, пренесува Дејли мејл.

Меѓутоа, историјата навестува дека можат да се појават и други проблеми со здравјето.

По пандемијата на шпанскиот грип во 1918 година, кога заболеле половина милијарда луѓе, многумина кои преживеале имале некој облик на депресија и се чувствувале летаргично. Луѓето исто така пријавиле вртоглавица, несоница, губење на слухот и мирисот и замаглен вид.

Поедини стручњаци веруваат дека пандемијата Ковид-19 ќе доведе до развивае на исти или слични болести.

„Во текот на епидемијата на САРС во 2003 година, пријавени се многу психијатриски и невролошки компликации“, неодамна предупреди италијанското Друштво за неврологија.

Ковид-19 исто така може да доведе до други долгорочни проблеми. Шест од десет луѓе кои биле позитивни на коронавирусот пријавиле губење на сетилото за мирис и вкус, а оваа состојба се нарекува аносмија.

Загубата може да биде привремена, но британските стручњаци истакнуваат дека во многу случаи може да биде и трајна, а таа состојба се нарекува поствирусна олфакторна загуба (PVOL)

-PVOL може да се доживее кај други респираторни инфекции, како што е грипот. Меѓутоа, кај Ковид-19, новообјавените извештаи укажуваат дека вирусот ги оштетува клетките на слузницата на носот кои ги поддржуваат клетките на рецепторите“, вели Карл Филпот, професор по ринологија и олфактологија на универзитетот Источна Англија.

Студиите покажале дека по опоравувањето од корона, секое четврто лице ќе има упорна кашлица која може да потрае и до десет недели откако телото ќе се исчисти од вирусот.

Можно е и после прележаниот вирус да се појави воспаление на дишните патишта, дури и ако почетната инфекција се смирила.

Постојат и многу загрижувачки извештаи дека инфекцијата Ковид-19 може да предизвика белодробна фиброза, создавање лузни и оштетувања на белодробното ткиво.

Доктор Овен Зенг, шеф на центарот за заразни болести во болницата „Princess Margaret“, предвидел дека некои пациенти по излекувањето од Ковид-19 можеби ќе имаат намалена функција на белите дробови, од 20 до 30 проценти.

Кардиоваскуларните стручњаци се загрижени дека инфекцијата Ковид-19 може да нанесе трајна штета на срцето дури и на луѓето кои немале претходно проблеми со срцето. Тоа може да доведе до миокардитис, воспаление на срцевиот мускул, а оштетувањата можат да бидат трајни. Лузните од коронавирусот исто така можат да предизвикаат проблеми со срцевиот ритам, тврдат кардиолозите од Тексас.