Стружанецот Михајло Ристовски во ист ден направил две испитувања за да види дали има антитела откако примил една доза од вакцината на „Астра-Зенека“ во Србија. На првиот тест, кој го направил во ,,Рес Хумана” му кажале дека нема антитела. Потоа, во лабораторијата Синлаб, резултатот покажал дека ,,пука од антитела”.

-Се вакцинирав во Србија пред месец дена. Во понеделникот отидов во лабораторијата на Рес Хумана во Скопје, за да видам каква ми е состојбата со антителата, дали имам развиено и колку. Ми кажаа дека немам антитела. Исто дојде и колегата од работа со мене, и нему му рекоа дека нема антитела. Но, јас се посомневав во овие резултати. Отидов во друга лабораторија, зашто не можев да се помирам, имам родители кои се пензионери дома, а не се вакцинирани и сакам да знам на што сум. И вториот тест што го направив истиот ден во Синлаб, покажа дека пукам од антитела, односно ако границата е 0.8, јас имам антитела 13, вели триесет и осумгодишниот стружанец за Слободен печат.

Тој додава дека не му е за парите, иако тестовите се разбира, чинат пари, туку се грижи за квалитетот и затоа ќе побара надлежните институции да проверат како се прават тестовите за антитела, односно како е можно, во ист ден, во две различни лаборатории, да се добијат сосема дијаметрално спротивни резултати.

-Се вратив во Рес Хумана, да им кажам дека на тестот од Синлаб имам многу антитела, но тие ми рекоа дека стојат на својот став дека резултатот ми е точен. Тестот во Рес хумана чинеше 800 денари, а тој во Синлаб 1500 денари, вели Ристовски.

Тој во нашата редакција ги достави двата резултати што ги добил и напомена дека утре ќе го пријави случајот во Државниот здравствен и санитарен инспекторат за да го испитаат случајот, а ќе се обрати и до Инстиутот за акредитација на лаборатории.

Се обративме во лабораторијата на Рес Хумана меѓутоа оттаму се децидни дека пациентот нема антитела.

-Правиме по сто тестови дневно, стоиме позади резултатот. Пациентот дојде да се заканува дека ќе не затвори, но не подлегнуваме на тие притисоци. Серумот го чуваме и тестот е направен и повторен и резултатот е тој. Пациентот нема антитела. Ние правиме тест за спајк антитела, а какви антитела се бараат во другата лабораторија не можам да знам, ни рече докторката што го спровела тестирањето.

Инаку Ристовски е поранешен пливач, маратонец на кратки патеки, кој учествуваше на летните олимписки игри во Пекинг во 2008 година.