Откако принцот Ендру објави дека повеќе нема да ги користи своите кралски титули (вклучувајќи ја и титулата војвода од Јорк), неговата поранешна сопруга Сара Фергусон ја отстрани титулата „војвотка од Јорк“ од своите профили на социјалните мрежи.

Ферги, како што ја нарекуваат од милост, го промени својот профил на платформата Икс, поранешен Твитер, пишува „Пипл“.

Нејзиниот профил на Икс е променет од “@SarahTheDuchess” во “@sarahMFergie15”, додека профилот на Инстаграм “@SarahFerguson15” остана ист.

Иако Сара Фергусон долго време го користеше своето име за професионални цели, сега, како што се дознава, ќе го користи во сите животни области. Слична промена се случи и на официјалната веб-страница на кралското семејство, каде што титулата војвода од Јорк на Ендру беше отстранета од неговата биографија во понеделникот, 20 октомври, и сега е наведен само како „принц Ендру“.

After Friday’s announcement, Andrew’s page on the https://t.co/P42SZrxyew website now just reads “Prince Andrew”, not the Duke of York.
And Sarah Ferguson’s Twitter handle is no longer “SarahTheDuchess” but now @sarahMFergie15 pic.twitter.com/F8v9g2L5BE

— Chris Ship (@chrisshipitv) October 20, 2025

Долгогодишна врска и покрај разводот

Интересно е што референците за неговата титула сѐ уште беа присутни во текстот на биографијата до вторникот, 21 октомври. Кралицата Елизабета го прогласи својот втор син за војвода од Јорк кога се ожени со Сара во 1986 година, со што таа стана војвотка од Јорк. Иако се разделија во март 1992 година и официјално се разведоа четири години подоцна, Ферги ја задржа својата титула.

И покрај разводот, Ендру и Сара останаа во многу добри односи, заедно ги одгледаа ќерките, принцезата Беатрис и принцезата Јуџини, и продолжија да живеат заедно во Ројал Лоџ во Виндзор.

„Постојано сум внатре и надвор, а и тој е постојано внатре и надвор. И не, не сме венчани. Многу сме среќни со начинот на кој стојат работите“, објасни Ферги во 2016 година за една австралиска радио емисија. Нивната ќерка Јуџини еднаш изјави: „Тие се најдобриот разведен пар што го познавам“.

Поврзаност со Џефри Епстин

Ферги го поддржуваше принцот Ендру и среде скандалот поврзан со неговото пријателство со Џефри Епстин, што доведе до негово повлекување од кралските должности во 2019 година и одземање на воените почести и покровителства во 2022 година.

„Што се однесува до принцот Ендру, тој е толку добар човек. Тој е љубезен, добар човек, и мислам дека рефлекторот треба да се тргне од него и да му се дозволи да продолжи со својот живот за да се изгради одново“, рече таа во 2023 година.

Одлуката на принцот Ендру да се откаже од титулите доаѓа среде обновени критики поради врските на него и Ферги со Епстин, кој почина во затвор во 2019 година додека чекаше судење. Минатиот месец неколку добротворни организации ги прекинаа врските со Сара откако во јавноста протече нејзиниот мејл до Епстин од 2011 година. Во пораката, наводно, го пофалила како „постојан, дарежлив и врвен пријател“, и тоа откако јавно се одрече од него во едно интервју.

Според нов извештај, Епстин во друг мејл од 2011 година му рекол на својот адвокат дека Сара „прва го прославила неговото пуштање на слобода со своите две ќерки“. Во времето на излегувањето на Епстин од затвор во 2009 година, Беатрис имала 20, а Јуџини 19 години. Извор близок до семејството тврди дека Беатрис и Јуџини никогаш не го запознале Епстин и дека не се сеќаваат на таква посета.