Пoлицијата во Ханау, во сојузната покраина Хесен, уапси 31-годишен маж под обвинение дека цртал свастики на автомобили и фасади со крв, јавува Гардијан.

Според полициското соопштение, 31-годишниот романски државјанин е осомничен дека го извршил делото како „можна спонтана реакција“ на проблеми на работа. Осомничениот ги цртал свастиките со сопствена крв и имал ниво на алкохол во крвта од 1,2 промили во моментот на апсењето. По апсењето бил однесен во психијатриска установа.

Според сведоците, а како што објавија германските медиуми, 31-годишниот Романец имал проблеми на работа, а чинот се толкува како „реакција на овие проблеми“. Полицијата започна истрага за прикажување на забранети симболи и оштетување на имот.

Градот Ханау е чувствителен на десничарско екстремистичко насилство поради масакрот во 2020 година кога десничарски екстремист застрела и уби девет граѓани од странско потекло.