„По утрото се познава денот“, вели старата изрека, а нутриционистите сè почесто истакнуваат дека тоа особено важи за првиот оброк во денот. Она што го јадеме наутро значително влијае врз енергијата, концентрацијата и апетитот во часовите што следуваат.

Особено проблематичен е појадокот со премалку протеини или неговото целосно прескокнување, бидејќи телото брзо почнува да бара брз извор на енергија – најчесто во форма на шеќер, пишува „Живим“.

Зошто протеините се важни наутро?

„Протеините во појадокот го забавуваат варењето, помагаат во одржување на стабилна енергија и подолго создаваат чувство на ситост“, објаснува нутриционистката Мариса Карп.

Протеините се варат побавно од јаглехидратите, што помага да се спречат наглите скокови и падови на шеќерот во крвта. Токму тие падови често стојат зад интензивната желба за благо, особено кога телото бара брз извор на енергија. Од друга страна, протеините го поттикнуваат лачењето на хормоните на ситост, помагајќи му на мозокот да регистрира чувство на задоволство и да ја намали потребата од дополнително грицкање.

Според Европската агенција за безбедност на храната (ЕФСА), препорачаниот дневен внес на протеини за возрасни изнесува 0,83 грама по килограм телесна тежина. Затоа, наместо засладено пециво, утрото можете да го започнете со јајца (едно средно јајце содржи околу шест до седум грама протеини) во комбинација со зеленчук или здрави масти како авокадо.

Смутијата се исто така добар избор, но само ако се правилно составени. Протеински прав, бобичесто овошје, зелено лиснато зеленчук, чиа семки и јаткасти плодови создаваат нутритивно богат оброк и помагаат во одржување на стабилно ниво на шеќер во крвта.

Други причини за желбата за шеќер

Иако протеинскиот појадок може значително да ја намали желбата за благо, тој не е единствениот фактор. Квалитетот на сонот игра голема улога.

„Кога не спиеме доволно, телото функционира како да е ‘на резерва’ и бара брза енергија. Шеќерот тогаш станува особено примамлив бидејќи нуди најбрз извор на гориво. Дополнително, недостатокот на сон ги нарушува хормоните на апетитот: се зголемува грелинот, кој ја поттикнува гладта, а се намалува лептинот, кој сигнализира ситост“, објаснува Карп.

Таа додава дека лошиот сон ја намалува и чувствителноста на инсулин, што го отежнува користењето на глукозата и дополнително ја зголемува желбата за слатко.

Стресот, хормоналните промени, предолгите паузи меѓу оброците и неурамнотежената исхрана исто така можат да ја зголемат желбата за шеќер – дури и кога појадокот содржи доволно протеини.