Една од најпопуларните американски пејачки Пинк вчера наполни 41 година…

Американската пејачка Алиша Бет Мур, попозната како Пинк (41) е родена на 8 септември 1979 година и вчера наполни 41 година.

Се прослави како бунтовна тинејџерка со розева коса, а и ден денес важи за една од најдобрите пејачки во светот. Родена е во Пенсилванија и имала тешко детство, бидејќи како дете заболела од астма, а родителите и се развеле пред 10-от роденден.

На 14 години започнала да настапува со еден бенд во локалните клубови, се додека една дискографска куќа не ја забележала и и понудила договор.

Првиот музички албум „Can’t Take Me Home” го објави во 2000 година, а со албумот „Misundaztood” ги покори светските музички топ-листи.

На врвот од својата кариера јавно ги критикуваше своите колешки Џесика Симпсон, Бритни Спирс и Кристина Агилера во текстовите од своите песни, а тоа наиде на огромна поддршка од публиката.
Ја критикуваше и американската власт, шовинизмот и сексизмот, како и културата која жените ги смета само како сексуални објекти.

За време на кариерата насловните страници од магазините ги полнеше и со приватниот живот уште откако го запозна својот сегашен сопруг Кери Харт (45).

Парот се запозна во 2001 година на мото-трка на која Кери возеше. Оттогаш се заедно, а во 2003 година на кратко раскинаа.

Во 2005 година Пинк му помагаше на своето момче во една трка, а потоа во еден момент подигна табла со натпис „Дали сакаш да се ожениш за мене? Сериозна сум!“. На тој начин пејачката всушност го запроси својот сегашен сопруг.

Кери на почетокот не го забележа натписот, па продолжи да вози, но кога сфати што се случува, ја прекина трката со цел да и одговори дека сака да се ожени со неа. Тие се венчаа на почетокот на следната година во Костарика и нивниот брак трае и денес, а заедно добија и две деца.