Тешка трагедија во албанскиот град Драч ја потресе јавноста, откако 57-годишен пијан возач прегази група деца додека играле на тротоар, објави „Вокс Албанија“.

Во кобниот настан на самото место загинале две деца на возраст од 10 и 13 години, едно 8-годишно дете е во критична состојба во болница во Тирана, додека четвртото дете од групата за среќа поминало без повреди.

Според сведоштвата на соседите, жртвите се блиски роднини, едното загинато и другото тешко повредено дете се браќа, додека, пак, втората жртва им е братучед чии родители моментално се наоѓаат во Италија поради лекување.

По несреќата, сторителот го оставил автомобилот и побегнал, но набрзо бил лоциран и уапсен од полицијата. Мештаните тврдат дека тој и претходно бил познат по проблематично возење и консумација на алкохол. При приведувањето, тој изразил каење изјавувајќи дека не заслужува да живее по тоа што им го сторил на децата.

Овој настан предизвика силни реакции кај албанскиот државен врв. Премиерот Еди Рама, покрај изразеното сочувство, упати и строг апел до медиумите да покажат етичност и новинарска одговорност, нагласувајќи дека објавувањето на вознемирувачки снимки од несреќата не е информирање, туку само непотребно ја зголемува болката на ужалените семејства.

Млад скопјанец починал на гости кај другар