Печената пченка има бројни здравствени придобивки поради високата содржина на растителни влакна, антиоксидантните својства и богатството со витамини. Влакната го поттикнуваат варењето и создаваат чувство на ситост, додека антиоксидансите ги штитат клетките од оштетувања и воспаленија. Пченката се смета за добар извор на витамини, бидејќи е богата со тиамин, ниацин, фолна киселина и витамин Ц, а содржи и есенцијални минерали како калиум, магнезиум, фосфор, цинк, бакар и железо, пишува „Е-клиника“.

Печената пченка има висока нутритивна вредност

Печената пченка е нискокалорична и природно безглутенска храна што го поддржува здравјето на цревата и создава енергија. Со оглед на нејзиниот благ и сладок вкус, не е чудо што е една од омилените есенски закуски. Но, многу поважно од вкусот е нејзината хранлива вредност. Пченката е намирница богата со влакна кои го намалуваат покачениот холестерол и ја регулираат дигестијата, а содржи и висок процент на фолна киселина и витамин Б1, кој е важен за правилно функционирање на мозокот. Богата е и со јаглехидрати кои му обезбедуваат на телото потребна енергија. Покрај тоа, влакната спречуваат запек и помагаат во одржување стабилно ниво на шеќер во крвта.

Пченката е важен сојузник на срцето и очите

Пченката не содржи многу калории – еден клип има околу 100 калории, па можат слободно да ја консумираат и оние кои внимаваат на линијата. Истражувањата покажуваат дека пченката е важен заштитник на срцето, благодарение на витамините Б5 и Ц, фолната киселина, бета-каротенот, фосфорот, калиумот и магнезиумот. Таа содржи и антиоксиданси како лутеин и зеаксантин, кои го намалуваат ризикот од макуларна дегенерација, што значи дека ги штити очите.

При печење се ослободува поголема количина антиоксиданси, па печената пченка може да биде дури и покорисна од варената. Научните анализи покажале и дека пченката го поттикнува развојот на добри бактерии во дебелото црево и помага при желудочни проблеми, бидејќи ги ублажува симптомите на гастритис и чир.

Пченката обезбедува „побавна“ енергија, подолго држи ситост и не предизвикува нагли скокови на шеќер во крвта како белиот леб или слатките производи. Природно е без глутен, па е безбедна за лица со нетолеранција на глутен.