Откако вчера патот кон Теферич пропадна и делови од асфалтот се распукаа, денеска градоначалничката на Кисела Вода, Бети Стаменкоска Трајкоска, информираше дека оваа сообраќајница повторно ќе биде затворена за сообраќај.

ГАЛЕРИЈА | „Реновираниот“ асфалт кај Теферич

„По денешниот повторен увид на терен со градоначалникот на Општина Сопиште, Јане Мицевски, и извршените стручни анализи, во координација со сите релевантни институции, донесена е одлука за итно затворање на овој патен правец. Ја информираме јавноста дека интензивно се работи на изнаоѓање на најбрзото и најбезбедното техничко решение за трајна санација на оштетувањето. Апелираме до сите граѓани доследно да ја почитуваат поставената сигнализација и да ги користат алтернативните патни правци сè до целосно отстранување на дефектот“, напиша Стаменкоска Трајкоска.

Градоначалничката додаде дека службите се „посветени на изнаоѓање на најбрзо и сигурно решение за враќање на патот во нормална функција“, фраза која жителите на Кисела Вода и Сопиште ја слушаат изминатите десет години, земајќи предвид дека Општината овој пат многупати го обновуваше и затвораше, а тој денеска повторно се распука и предизвикува опасност за граѓаните.