Папата Франциск одлучи да и врати на Грција три дела од античкиот храм Партенон над Атина, стари 2.500 години, кои уште од 19 век се наоѓаат во папските збирки во ватиканските музеи.

Украдените старогрчки артефакти папата официјално ќе му ги „донира“ на поглаварот на Грчката православна црква, Јероним Втори, како гест на екуменски дијалог со Римокатоличката црква, соопшти Ватикан.

На Грција ќе ѝ бидат вратени дел од главата на коњот што ја влече колата на божицата Атина на западната страна на познатиот храм на Акропол, како и скулптури – глава на момче и човек со брада.

Засега не е познато како ќе постапи атинскиот архиепископ Јероним со скулптурите, односно дали тие ќе бидат изложени во некој од грчките музеи.

За време на неговата посета на Грција лани, папата Франциск на средба со грчкиот архиепископ им се извини на Грците за постапките на католиците низ историјата.