Август носи исклучително богата и разновидна филмска понуда во кината и на стриминг-платформите. Од новиот пост-апокалиптичен проект на неуморниот Ридли Скот и враќањето на култните хорор-режисери, па сè до остварувања за кои се веруваше дека никогаш нема да ја здогледаат светлината на денот, еве ги 10-те филмски наслови што ќе го одбележат следниот месец, пишува “Би-би-си“. 

1. Само една ноќ – One Night Only

Романтична комедија сместена во бизарен алтернативен универзум каде што за самците е илегално да имаат интимни односи, освен во еден единствен ден во годината. Филмот е во режија на Вил Глук, а главните улоги ги толкуваат Моника Барбаро и Калум Тарнер.

2. Продавачот на сладолед – Ice Cream Man

Кралот на крвавиот хорор, Ели Рот, се враќа со својот најлуд нискобуџетен филм досега. Приказната го следи мистериозниот продавач на сладолед (Ари Милен), чии смрзнати десерти ги претвораат децата во грабливи, убиствени суштества.

3. Кучешки ѕвезди – The Dog Stars

Легендарниот Ридли Скот (88) не запира. По „Гладијатор 2“ тој ја екранизираше пост-апокалиптичната драма на Питер Хелер за преживеаните по разорна пандемија. Во главните улоги се појавуваат Џејкоб Елорди, Маргарет Куоли и Џош Бролин.

4. Тони – Tony

Биографска филмска приказна инспирирана од младоста и раните готвачки денови на култниот Ентони Бурдејн од средината на 1970-тите години. Младиот Бурдејн го глуми Доминик Сеса, а во останатите улоги се појавуваат Антонио Бандерас, Лео Вудал и Емилија Џонс.

5. Тинејџерски секс и смрт во кампот Мијазма – Teenage Sex and Death at Camp Miasma

Најдобро оценетиот филм на овогодишниот филмски фестивал во Кан е во режија на Џејн Шенбрун. Приказната ги следи обидите на млада режисерка (Хана Еинбиндер) да го оживее хорор-серијалот од 80-тите, ангажирајќи ја оригиналната ѕвезда од филмот (Џилијан Андерсон).

6. Крајот на улицата Оук – The End of Oak Street

Што се случува кога мирна и обична американска приградска населба одеднаш ќе се телепортира во праисториски свет со диносауруси? Ен Хатавеј и Иван Мекгрегор ги толкуваат улогите на родители кои мора да си ги заштитат семејствата во оваа научно-фантастична авантура во продукција на Џ.Џ. Абрамс.

7. Погрешните девојки – The Wrong Girls

Кристен Стјуарт и Алија Шокат предводат нетипична женска комедија за две пријателки кои по прекумерно уживање во канабис случајно влегуваат во опасниот криминален подземен свет. Интересно е што гласовите на нивните мачки кои им „зборуваат“ за време на халуцинациите им ги позајмуваат Сет Роген и Кумаил Нанџиани.

8. Округот Јунион – Union County

Длабоко емотивна и реалистична драма за двајца браќа во Охајо (Вил Полтер и Ноа Сентинео) кои се борат со зависноста од опијати за да останат надвор од затвор. Филмот е исклучително автентичен бидејќи речиси целиот спореден ансамбл е составен од натуршници кои ги раскажуваат сопствените животни приказни.

9. Којот против Акме – Coyote vs Acme

Филмот за кој многумина мислеа дека никогаш нема да излезе. Комбинацијата од игран филм и 2Д анимација го следи познатиот цртан јунак Којот кој конечно одлучува да ја тужи компанијата „Акме“ за сите дефектни производи што му го уништија животот. По неколкугодишно исчекување, филмот конечно ги отвора вратите во кината.

10. Волшебното далечно дрво – The Magic Faraway Tree

Ова е модерна адаптација на омилените детски класици на Енид Блајтон. Клер Фој и Ендру Гарфилд глумат родители кои ги селат децата на село за да ги оддалечат од екраните, таму децата во блиската шума откриваат волшебно дрво кое води кон фантастични светови.