Местото каде што реката Лепенец се влева во Вардар денеска е прекриено со необична бела и пенлива материја, а надлежните најавија дека ќе се испитува што го предизвикало тоа.

Градоначалникот на Скопје, Орце Ѓорѓиевски, дојде на местото во населбата Злокуќани со инспекторите. Тој рече дека иако тоа било во ингеренции на Министерството за животна средина, тие зеле мостри од пената и Градот самиот ќе испита кој е загадувачот.

Ѓорѓиевски и пред анализите претпоставува дека реката е загадена, вели дека „вакви испади и неодговорно однесување имало и порано, но и оти „овој пат ќе има постапување“.

Лепенец извира од планината Жар на Косово и преку Качаничката Клисура тече кон устието во Вардар. Над местото и покрај него има повеќе фирми.

Слична ситуација лани беше забележана и во канал кој се влева во Вардар во селото Таор.

ФОТО: Чудна бела пена извира од канал крај Вардар во Скопско, итно се анализираат примероци