Шпанската влада прогласи вонредна состојба доцна синоќа откако серија пожари ја загрозија областа околу Мадрид и соседната покраина Авила, предизвикувајќи евакуација на повеќе од 19.000 луѓе, пренесува „Ел Паис“.

Два големи пожари во близина на Мадрид се споија во еден, а трет е опасно блиску до спојување. Шефицата на регионот Мадрид, Изабел Дијаз Ајусо, ја опиша ситуацијата како „најлошиот пожар во историјата на нашиот регион“ и „совршена бура од екстремни температури и силни ветрови“.

Ова е само второ прогласување на таква национална вонредна состојба во историјата на Шпанија, по онаа за време на големото затемнување во април 2025 година. Премиерот Педро Санчез одржа итен состанок и најави мобилизација на сите ресурси, додека Шпанија побара и помош преку Механизмот за цивилна заштита на Европската унија, пишува „Гардијан“.

21:25 Está metido en el Tiemblo, Ávila. #IFBurgohondo. pic.twitter.com/oh5iIKAT9M

— Infues Avila (@InfuesAvila) July 23, 2026

Министерството за внатрешни работи на Шпанија соопшти дека одлуката е донесена поради истовременото избувнување на неколку пожари, неповолните временски услови и потребата од мобилизирање на повеќе ресурси од различни јавни администрации, што ја зголемува сложеноста на напорите на пожарникарите и цивилната заштита.

Пожарите се поврзуваат со климатските промени

Шпанија, како и поголемиот дел од јужна Европа, се соочува со сè посериозни пожари што научниците ги поврзуваат со климатските промени, пишува „Ројтерс“. Експертите велат дека имало голем раст на вегетацијата по невообичаено обилните дождови во пролетта и дека вегетацијата сега се исушила во екстремната летна жештина, што го поттикнува брзото ширење на пожарот.

Регионалните власти во Мадрид апелираа за помош, опишувајќи ја ситуацијата како „исклучително сериозна“. Властите изјавија дека активните пожари во градовите Вила дел Прадо, Сан Мартин де Валдеиглесијас и Алморокс во соседната покраина Кастиља-Ла Манча имаат потенцијал да се прошират надвор од сегашниот капацитет за гаснење пожари.

Тие, исто така, предупредија дека пожарот во Бургохонд во покраината Авила би можел да стигне до регионот на Мадрид во наредните часови поради временските услови.

Драматични сцени и во Франција

Условите во соседна Франција се подеднакво драматични. 32 пожари беснеат на југозападот од земјата и во други региони, поради што вкупниот број на евакуирани лица во Шпанија и Франција надмина 80.000 луѓе. Француските власти наредија целосна евакуација на познатиот туристички полуостров Кап Ферет „село по село“ – околу 40.000 луѓе се евакуираат по копно и море, вклучувајќи многу туристи од кампови и викендички, а бродовите превезуваат стотици луѓе бидејќи постои опасност од пресекување на единствениот пат. Пожарот во Жиронда проголта повеќе од 10.000 хектари и уништи најмалку 80 домови. Појужно, во близина на Бискарос, уште 25.000 луѓе беа евакуирани, додека повеќе од 600 пожарникари се бореа со пожарот до 10 метри висок.

Претседателот Емануел Макрон го активираше Механизмот за цивилна заштита на ЕУ и најави пристигнување на воздушни засилувања, вклучувајќи два канадски авиони од Хрватска, два авиони од Португалија и тешки хеликоптери од Чешка и Словачка. Повеќе од 50.000 хектари изгореа во Франција оваа година, што е речиси четири пати повеќе отколку во истиот период минатата година.

Според регионалната влада, над 10.000 луѓе беа евакуирани од градовите Вила дел Прадо, Сан Мартин де Валдеиглесијас, Пелајос де ла Преса и Алдеа дел Фресно.

Франција зафатена од големи пожари — евакуирани над 20 илјади луѓе