Етиопија гради таен камп во западниот регион Бенишангул-Гумуз, во близина на границата со Судан, за обука на илјадници борци за паравоената група Сили за брза поддршка РСФ(RSF), откриваат извори запознаени со изградбата и сателитските снимки.

Кампот, првиот директен доказ за вмешаноста на Етиопија во граѓанската војна во Судан, наводно им обезбедува на РСФ значителна количина регрути додека борбите во јужен Судан се интензивираат, објави Ројтерс.

Според осум извори, вклучувајќи претставници на етиопската влада, Обединетите Арапски Емирати (ОАЕ) ја финансирале изградбата на кампот и обезбедиле воена и логистичка поддршка, тврдење што ОАЕ го негираат.

Сателитските снимки, исто така, ја покажуваат надградбата на аеродромот Асоса за операции со беспилотни летала.

На почетокот на јануари, околу 4.300 борци на РСФ тренираа во кампот, а регрутите се претежно Етиопјани, а присутни се и граѓани на Судан и Јужен Судан.

Граѓанската војна во Судан, која избувна во 2023 година, предизвика глад и етнички злосторства, додека милиони бегалци бегаат во соседните земји.

Изворите велат дека стотици регрути веќе се приклучиле на РСФ на фронтот на Синиот Нил.

Високиот етиопски функционер, генерал Гетачев Гудина, го надгледувал поставувањето на кампот, потврдија изворите, додека Судан и РСФ не одговориле на барањата за коментар.