Грижливите татковци се реткост кај животните, истражувањата покажуваат дека само 3 до 5 отсто од татковците кај цицачите активно учествуваат во одгледувањето на потомството. Но, причината зошто некои мажи се посвесни за родителство можеби се крие во невробиологијата, пишува „„Сентифик американ“ (Scientific American).

Ново истражување со африкански пругави глувци открива дека еден единствен ген, наречен „агути“, може да има клучна улога во тоа дали машките глувци се грижат за младенците. Имено, поактивната експресија на овој ген била поврзана со поголема агресивност, додека помалку агресивните татковци имале пониска експресија. Кога генот бил активиран кај грижливите глувци, тие станувале агресивни кон младенците.

Истражувачите објаснуваат дека социјалните и еколошките услови исто така влијаат, глувците во изолација покажувале поголема грижа за потомството, додека оние во погусто населени групи покажувале незаинтересираност. Генот агути ја интегрира долгорочната средина, а не моменталната достапност на храна.

„Мажите глувци имаат се што им е потребно за да бидат добри татковци. Не им треба нова невронска мрежа или уникатна еволуција на клетки во мозокот“, вели Кетрин Пенја, доцент по невронаука на Универзитетот Принстон и водечка авторка на студијата.

Африканските пругави глувци се, слично како луѓето, меѓу ретките цицачи кај кои мажите се делумно грижат за младенците, ги чистат и им обезбедуваат храна. Но, некои од нив го немаат овој инстинкт и дури можат да ги повредат своите младенци.

Студијата е значаен напредок во разбирањето на родителското однесување и неговата биолошка основа, особено затоа што односот на таткото е помалку проучуван од оној на мајката. Наодот дека генот агути, познат по улогата во пигментацијата и метаболизмот, влијае на инстинктот на татковците, бил вистинско изненадување, заклучуваат научниците.