Оскар Пјастри обезбеди старт од пол-позицијата за главната трка на Големата награда на Емилија Ромања во Италија откако го постави најбрзиот круг во квалификациите (1:14.670) во Формула 1 шампионатот.

Макс Ферстапен обезбеди старт од второто место (+0.034), додека Џорџ Расел (+0.137) ќе стартува како трет.

Британскиот возач на Мерцедес влезе во последниот дел од квалификациите со најбрз круг, но Пјастри стигна до најдобар резултат во третата етапа.

Почетокот на квалификациите за трката Емилија-Ромања беше доста турбулентен, Јуки Цунода доживеа голема несреќа кој со својот болид „Ред Бул“ излета од патеката и удри во заштитната ограда.

Ферари имаше разочарувачка втора етапа, откако нивните двајца возачи беа првите под цртата по втората рунда од квалификациите. Тие беа неколку десетинки зад Александар Албон, а Луис Хамилтон ја пропушти шансата да се бори за пол позиција за прв пат во новиот болид.