Италијанската премиерка Џорџа Мелони денеска јавно го осуди нападот на американскиот претседател Доналд Трамп врз папата Лав, оценувајќи дека таквиот настап е неприфатлив. Со тоа таа се приклучи на политичари од различни идеолошки табори во Италија, кои застанаа во одбрана на поглаварот на Римокатоличката црква. Оваа реакција е особено значајна бидејќи ретко се случува Мелони отворено да му се спротивстави на Трамп, со кого последниве години градела блиски политички односи, објави „Ројтерс“.

Гневот во Италија се разгоре откако Трамп во неделата го нарече папата „ужасен“ во долг и остар напад. Дополнителни реакции предизвика и неговата објава на вештачки генерирана слика на која е претставен како фигура налик на Исус, што многумина христијани го доживеаја како богохулно и навредливо.

Папата му одговори на Трамп: Не се плашам, мојата мисија е мирот

Папата Лав, кој стои на чело на 1,4 милијарди католици ширум светот, бргу одговори дека не се плаши од администрацијата на Трамп и најави дека и натаму јавно ќе зборува против војната што ја предводат САД против Иран, како и во одбрана на мигрантите.

Мелони првин излезе со внимателно формулирано соопштение во поддршка на папата, додека тој заминуваше на голема посета на четири африкански земји, но без директно да го именува Трамп. Опозициските партии веднаш ја нападнаа, обвинувајќи ја дека нема храброст јасно да го осуди американскиот претседател. Под притисок на тие критики, таа подоцна истиот ден објави нова, многу појасна порака, во која истакна дека зборовите на Трамп кон папата се недозволиви и дека е сосема нормално папата да повикува на мир и да ја осудува секоја војна.

Случајот отвори поширока дебата и за политичката цена на блискоста со Трамп. Иако Мелони беше единствениот европски лидер што присуствуваше на неговата инаугурација во 2025 година, денес неговото име за многу Италијанци станува товар наместо предност. Според анкетите, дури 66 отсто од Италијанците имаат негативно мислење за него, а дел од аналитичарите сметаат дека врските на Мелони со Белата куќа можеби придонеле и за нејзиниот пораз на минатомесечниот референдум за правосудните реформи.

Папата му одговори на Трамп: Не се плашам, мојата мисија е мирот

Од Трамп се дистанцираше и вицепремиерот Матео Салвини, кој во минатото често се поврзуваше со него. Тој порача дека папата Лав е духовен водач на милијарди верници и човек што се залага за мир, па затоа нападите врз него не се ниту мудри ниту корисни. Слични пораки дојдоа и од поранешниот премиер Матео Ренци, кој оцени дека папата е „градител на мостови“, за разлика од Трамп, кого го опиша како разрушувач на односи и цивилизациски вредности.

Во италијанската јавност се оживеа и старата изрека „кој ќе тргне против папата, самиот ќе пропадне“, што симболично потсетува на долгата историја на судири меѓу световната власт и папството. Историчари и црковни претставници предупредија дека нападот на Трамп не ја покажува слабоста на папата, туку напротив, сведочи дека неговите зборови имаат тежина и морална сила што не може лесно да се игнорира.

Трамп го нарече папата Лав „слаб“ и „ужасен“