Омилената македонска пита со поинаков рецепт: Пробајте ги триаголниците со месо од готови кори
Питите се релативно брзо јадење за подготовка, а секогаш се добредојдени ако ненадејно ви дојдат гости, но и како одличен избор и за појадок и за вечера.
Една од омилените на нашите простори, покрај питите со сирење, секако е питата со месo, особено доколку се подготвува во малку поинакво издание – во облик на триаголници. Мошне едноставни за приготвување, вкусни и декоративни.
Состојки:
– 500 гр кори за пита
– 2 средни главици кромид
– 500 гр мелено јунешко месо
– 1 чаша кисела павлака
– 3 јајца
– 200 мл кисела вода
– 150 милилитри масло за јадење
– 2 лажички сол
– 1 лажичка бибер
– 2 чешниња лук
– сусам за посипување
Подготовка:
Ситно исечкајте го кромидот и динстајте го на малку масло и вода. Кога кромидот ќе стане стаклест, додадете ги ситно исечканиот лук, меленото месо и зачините по вкус и динстајте.
Во друг сад изматете ги јајцата, павлаката, киселата вода, солта, биберот и маслото.
Сите кори по должина пресечете ги на половина.
Еден преполовен лист од кората премачкајте го со преливот од јајцата и павлаката, ставете ја преку другата кора, а потоа и третата и нанесете го филот. Обвиткајте ја кората во вид на триаголник и продолжете ја постапката додека не го потрошите цел материјал.
Готовите триаголници наредете ги во плехот, премачкајте ги сите со преливот од јајцата и павлаката, посипете со сусам и печете во загреана рерна на 200 степени Целзиусови.
Кога ќе заруменат, извадете ги да се изладат и послужете.