Турскиот репрезентативец со потекло од Охрид, Чеди Осман, направи големо изненадување во европската кошарка и официјално го засили ПАОК. Солунскиот клуб реализираше спектакуларен трансфер за кој ќе одвои неколку милиони евра.

Триесет и едногодишниот кошаркар потпиша тригодишен договор со ПАОК вреден девет милиони евра нето, односно три милиони евра по сезона. Покрај платата на играчот, солунскиот клуб ќе му исплати и обештетување од два милиони евра на Панатинаикос.

ПАОК во новата сезона ќе настапува во Еврокупот, а со ангажманот на Осман добива сериозно засилување и еден од најпознатите европски кошаркари.

Осман, кој седум сезони настапуваше во НБА лигата за Кливленд и Сан Антонио, во 2024 година се врати на европската сцена. Минатата сезона имаше одлични настапи во дресот на Панатинаикос, каде во Евролигата просечно постигнуваше 12,9 поени, 3,5 скока и 1,2 асистенции по натпревар.