Македонската млада кошаркарска репрезентација го претрпе вториот пораз на Европското првенство од Б-дивизијата, откако загуби од селекцијата на Ирска со 69:56.

Ирците уште од самиот почеток ја презедоа контролата врз натпреварот и по првата четвртина имаа предност од 20:13. Македонските кошаркари заиграа подобро во втората делница и успеаја да ја намалат негативата, па на полувремето резултатот изнесуваше 31:27 за Ирска.

Клучниот момент на натпреварот се случи во третата четвртина, во која Македонија постигна само пет поени. Таквиот пад во играта противникот максимално го искористи и пред последните десет минути стекна убедлива предност од 48:32.

Во завршницата се играше поефикасно на двете страни, но македонската селекција успеа само да го ублажи поразот и мечот заврши со конечни 69:56 во корист на Ирска.

Најефикасен во македонскиот состав беше Коста Ќириловски со 17 поени, пет скока и една асистенција, додека кај Ирска се истакна Виктор Окојие со дабл-дабл учинок од 24 поени, 10 скока и една асистенција.