Манчестер сити официјално го потврди ангажманот на Жереми Монга, еден од најталентираните млади англиски фудбалери, кој пристигнува од Лестер. Монга вчера го прослави својот 17. роденден, а со актуелниот англиски шампион потпиша петгодишен договор, кој ќе важи до летото 2031 година.

Младиот крилен напаѓач е производ на академијата на Лестер, каде што тренира уште од деветгодишна возраст. Со својата брзина, дриблинг, физичка сила и голгетерски инстинкт брзо се наметна како еден од најголемите таленти во англискиот фудбал. На само 15 години настапуваше за тимот на Лестер до 21 година, а во ноември 2024 година стана најмладиот стрелец во историјата на младинската Премиер лига.

Во април 2025 година дебитираше и во Премиер лигата, на натпреварот против Њукасл, со што стана вториот најмлад фудбалер кој добил минутажа во англиската елита. Во сезоната 2024/25 забележа седум настапи во шампионатот.

Минатата сезона постави уште два рекорда во дресот на Лестер. Најпрво стана најмладиот стартер во историјата на клубот, а само неколку дена подоцна и најмладиот стрелец во историјата на Чемпионшип. Против Престон погоди на возраст од 16 години и 37 дена, соборувајќи го рекордот што дотогаш го држеше Џуд Белингам.

„Кога дознав дека Манчестер сити е заинтересиран за мене, веднаш знаев дека тоа е вистинскиот чекор. За секој млад фудбалер, трансфер во ваков клуб е остварување на сонот“, изјави Монга.

Тој додаде дека Манчестер сити е најдобриот англиски клуб во последната деценија и посочи дека развојот на играчи како Фил Фоден и Нико О’Рајли покажува дека младите фудбалери добиваат вистинска шанса.

„Привилегија е да бидам дел од овој клуб“, порача новото засилување на „граѓаните“.