Фудбалскиот клуб Скопје ќе има нов шеф на стручниот штаб во претстојната сезона, откако Александар Таневски и официјално се раздели со клубот. Веста ја соопшти самиот стратег преку објава на социјалните мрежи.

Таневски се прости со емотивна порака, во која им се заблагодари на играчите, стручниот штаб, навивачите и на сите кои биле дел од успешната сезона во која Скопје обезбеди враќање во Првата лига.

„Некои одлуки во фудбалот се најтешки токму кога има почит и заеднички успех. Не си заминувам од ФК Скопје затоа што не го сакам клубот, играчите, навивачите и луѓето од населбата. Напротив – токму поради сè што поминавме заедно, оваа одлука ми е тешка. Заедно создадовме тим, атмосфера и успех на кој сите можеме да бидеме горди. Го вративме клубот таму каде што заслужува да биде – во Првата лига. Но понекогаш, колку и да сакаш нешто, мора да прифатиш дека некои приказни треба да завршат додека сè уште има достоинство, почит и убави спомени. Ви благодарам на играчите, стручниот штаб, навивачите и сите што беа дел од оваа сезона. ФК Скопје секогаш ќе има посебно место во моето срце“, објави Таневски.