Охридскиот аеродром „Св. Апостол Павле“, кој функционира уште од 70-тите години на минатиот век, до вчера практично бил дивоградба, а сега конечно е легализиран и впишан во катастар, со што овој стратешки објект за првпат доби имотен лист, објави вицепремиерот и министер за транспорт и врски, Александар Николоски.

„Во текот на изминатата година, тимови од Министерството за транспорт, АД Аеродроми и ТАВ, во соработка со Катастарот, Државното правобранителство, Управата за имотно-правни работи и други државни институции, интензивно работеа на конечно решавање на имотно-правниот статус на аеродромот“, вели Николоски.

Тој посочи дека иако ваквата постапка во нормални околности не би претставувала вест, но поради долгогодишната негрижа и запоставување на државниот капитал, легализацијата на Охридскиот аеродром е значаен чекор.