Првиот концерт на новиот рок-фузија состав на македонската сцена ќе се одржи на 28 април, од 20 часот, во „Лабораториум“ во Скопје.

Составот „Од пр’ва“ е проект кој ја слави музичката хемија и креативната слобода на тројца врвни професионалци: Ѓокица Зафировски („Suns“) – гитара и вокал, Михаил Парушев – тапани и Ѓоле Максимовски – бас.

„Кога мајсторите ќе се спојат, музиката тече – од пр’ва!“ – е слоган со кој се формираше составот и со кој се најавува нивниот прв концерт.

Публиката треба да очекува моќна рок-фузија проткаена со препознатливиот авторски печат на Зафировски. Ова е музика која се раѓа во моментот, со прецизност и енергија која се чувствува само кога се свири искрено и „од пр’ва“.

Вечерта ќе биде заокружена со новото видување на материјалот од албумот „Вселена“, како и неколку култни хитови од ерата на „Санс“ (Suns). Панк-рок и гранџ-енергијата од младоста сега добиваат сосема нов облик, филтрирани низ зрелата музичка хемија која бендот ја изгради на пробите специјално за овој настан во „Лабораториум“.

Како предгрупа ќе настапи Илија Димитровски – акустично, млад рокер со свеж пристап.