Заштедата на пари може да го подобри квалитетот на сонот, сугерира новото истражување. Значајно е да се напомене дека не треба да имате ризница полна со пари и богатства, доволни се и малите суми одвоени на страна, пишува „Би-би-си“.

Чувањето пари, без разлика колку е мало, им помогнало на учесниците во истражувањето да се опуштат и да се чувствуваат пооптимистично за својата иднина.

Академиците од Универзитетот во Бристол исто така открија дека клучот е во редовното штедење, а не во количината на сумата.

Добра илустрација за ова е дека оние со пониски примања кои издвоиле пари за „црни“ денови забележале слично ниво на задоволство како побогатите луѓе кои не штеделе на страна.

Заштедата на пари стана особено тешка во изминатите неколку години поради скокот на цените на храната и на сметките.

Британските експерти велат дека штедењето пари го зголемува нивото на животно задоволство бидејќи луѓето кои издвојуваат пари се чувствуваат помалку вознемирени, помала е веројатноста да влезат во проблеми со долгови и подобро се подготвени да се справат со неочекувани настани и трошоци.

Истражувањето опфатило податоци од неколку различни студии, вклучително и она што ги следело заштедите на илјадници луѓе во период од десет години.

Она што тие исто така открија е дека не само што штедењето го зголемува животното задоволство, туку дека нештедењето има негативно влијание и ја зголемува анксиозноста.