Новиот филм „Драма“, во кој главните улоги ги толкуваат холивудските миленици Зендаја и Роберт Патинсон, предизвика бура од реакции и морални дебати уште пред официјалната премиера. Иако на почетокот изгледа како блескава романтична комедија, приказната добива мрачен пресврт кој ја згрози јавноста, пишува „Гардијан“.

Признание кое менува сè

Дејството ги следи свршениците Ема (Зендаја) и Чарли (Патинсон) една недела пред нивната венчавка во Бостон. По една вечер помината со пријателите и премногу вино, тие одлучуваат да ги споделат најлошите работи што некогаш ги направиле во животот.

Во тој момент, Ема признава дека на 15-годишна возраст планирала да внесе пушка во своето средно училиште и да ги убие своите соученици. Иако во последен момент се откажала од планот и никој никогаш не дознал за нејзините намери, признанието го остава Чарли во шок. Остатокот од филмот се фокусира на прашањето дали тој може да продолжи со венчавката и дали треба да се плаши од личноста со која планирал да го сподели животот.

Остри критики од семејствата на жртвите

Темата за училишните масакри е исклучително чувствителна во САД, па затоа филмот веќе се соочува со сериозни осуди. Таткото на една од жртвите во масакрот во средното училиште „Колумбајн“ во изјава за „ТМЗ“ го нарече заплетот на филмот „грозен“.

Критичарите пак, истакнуваат дека филмот свесно презема огромен ризик, комбинирајќи го црниот хумор со тешката социјална драма. Иако одредени сцени потсетуваат на наградуваната серија на Нетфликс, „Адолесценција“, многумина веруваат дека „Драма“ ќе биде еден од оние филмови за кои публиката ќе води жестоки расправи  долго по напуштањето на кино-салите.

Дали е оправдано ваква тема да се користи во блокбастер со светски ѕвезди, или уметноста нема граници, останува на гледачите да проценат.