Многу студии ги оценија потенцијалните здравствени придобивки и последици поврзани со јадењето јајца. Иако сè уште има дебата околу оваа тема, сепак стои фактот дека повременото и умерено јадење јајце е добро, но доколку тоа го правите почесто, можеби не е здраво.

Најновата студија го истражува токму ова прашање, предупредувајќи дека прекумерната консумација на јајца може да го зголеми ризикот од дијабетес.

Новата студија на Универзитетот во Јужна Австралија во соработка со Универзитетот во Катар и Кинескиот медицински Универзитет, откри дека јадењето јајце секој ден може значително да го зголеми ризикот од развој на дијабетес од типот 2. Истражувањето траело од 1991 до 2009 година и се фокусирало на возрасни Кинези.

Кина во последниве неколку години се соочува со растечка криза во јавното здравство, известувајќи за значително зголемување на луѓе кои боледуваат од дијабетес тип 2. За тоа време, експертите откриле дека традиционалната исхрана во Кина почесто почнала да се заменува со друг вид на храна, вклучително се зголемила и потрошувачката на јајца и калорични закуски.

Оваа нова студија специјално се фокусира на долгорочната потрошувачка на јајца и нејзината потенцијална улога во развојот на дијабетес. Резултатите откриле голема поврзаност, откривајќи дека возрасните луѓе кои често јадат едно или повеќе јајца на ден, се соочуваат со 60% зголемување на ризикот од дијабетес.

Покрај тоа, се покажа дека долгорочната консумација на повеќе од 35 грама јајце на ден, го зголемува ризикот за околу 25%. Исто така, студијата забележува дека жените се соочуваат со поголемо влијание на овој ризик отколку мажите.

Сепак, истражувачите предупредуваат дека е потребно дополнително истражување на оваа тема за да се разбере улогата на јајцата во развојот на оваа болест.