Додека за некои мирисот на канабис е неподнослив, други тврдат дека им помага за релаксација, сон или болка. Иако во Британија рекреативната употреба на канабис е нелегална и класифицирана како дрога од Б-класа, медицинскиот канабис може да се добие со рецепт, а производи со мала количина на ЦБД се слободно достапни. Со легализацијата во одредени земји и сојузни држави, употребата на канабис значително се зголемила, особено кај луѓе на средна и повозрасна возраст.

Истражувачи од Универзитетот во Колорадо Аншуц анализирале податоци од UK Biobank, фокусирајќи се на испитаници на возраст од 40 до 70 години и влијанието на канабисот врз мозокот, пренесува „Лед бајбл“.

„Сѐ повеќе постари лица користат канабис. Тој е подостапен и се користи од различни причини – како проблеми со спиењето или хронична болка“, изјави водечката авторка на студијата, д-р Аника Гуха.

Главниот наод покажал дека умерената употреба на канабис во текот на животот кај оваа возрасна група е поврзана со поголем волумен на одредени делови од мозокот и подобра когнитивна функција. Сепак, истражувачите нагласуваат дека умереноста е клучна.

„Ова не значи дека поголема количина автоматски носи подобри резултати. Сѐ зависи од начинот на употреба и од тоа што точно се мери“, предупреди Гуха.

Таа додаде дека повеќето учесници користеле канабис во минатото, кога производите значително се разликувале од денешните, кои се многу посилни.

Што се случува со телото по консумирање канабис?

Ефектите од канабисот зависат од начинот на употреба, количината и индивидуалната чувствителност, но одредени реакции на телото се јавуваат речиси секогаш во сличен временски распон.

Првите 2 до 10 минути:

Кај пушење или испарување, активните состојки брзо стигнуваат до крвотокот преку белите дробови. Најчестата прва реакција е забрзување на срцевиот ритам, кој може значително да се зголеми и да остане таков неколку часа. Се јавува чувство на топлина, благо вртоглавица или опуштеност. Крвните садови во очите се шират, поради што тие стануваат црвени и посјајни.

По 20 минути:

Состојката ТХЦ целосно циркулира низ телото и почнува интензивно да делува врз централниот нервен систем. Мозокот ослободува допамин, што создава чувство на задоволство и еуфорија. Кај некои луѓе ова може да се манифестира како смиреност и подобрено расположение, додека кај други – како анксиозност, немир или забрзани мисли. Во овој период често се појавува и зголемен апетит, познат како „munchies“.

По околу 30 минути:

Ефектите достигнуваат врв. Сетилата можат да бидат засилени – боите изгледаат поинтензивни, музиката подлабока, а времето може да се доживува како забавено. Во исто време, може да се појават потешкотии со концентрацијата, забавени реакции, нарушена краткорочна меморија и намалена координација на движењата. Поради тоа, во овој период не се препорачува возење или донесување важни одлуки.

По 24 часа:

Иако најголем дел од ефектите исчезнуваат по неколку часа, трагите од канабисот можат да се детектираат во урината и неколку дена подоцна. До 24 часа по употребата, расудувањето може да биде нарушено, а мислите и разговорите да изгледаат „подлабоки“ отколку што навистина се.