Њукасл му се закани на Милан со мултимилионска тужба поради италијанскиот репрезентативец Сандро Тонали, кој најверојатно ќе биде суспендиран на 10 месеци поради нелегално обложување на натпреварите на кои играл, пишува „Кориере дело спорт“.

Тонали во летниот преоден рок пристигна во Њукасл од Милано за 70 милиони евра, а оваа сезона одигра 10 мечеви за англискиот клуб во сите натпреварувања.

Италијанските медиуми пренесуваат дека првите луѓе на Њукасл се гневни, бидејќи одвоиле огромна сума на пари за Тонали, кој поради суспензија нема да игра до крајот на сезоната, а ќе го пропушти и Европското првенство.

Раководството на англискиот клуб планира да ја суспендира платата на Тонали која изнесува околу осум милиони евра по сезона.

Фудбалерот призна дека се обложил на натпреварите на кои настапувал за Милан и Бреша, но бидејќи соработувал со италијанските власти, најверојатно ќе биде казнет со само 10-месечна забрана.