Родители на невакцинирано првче одбиле да си го земат детето дома, по што им биле повикани полиција и просветни инспектори. Овој инцидент, како што објави  „А1он“, се случил во основното училиште „Блаже Конески“ во Велес. Мајката на детето за „А1он“ вели дека од вчера има забранет пристап во училиштето, бидејќи одбивала да престане да го носи детето на училиште, а вчера обезбедувањето ја пријавило во полиција и ѝ забраниле да влегува во објектот.

Од МВР демантираат дека биле преземени некакви активности од страна на полицијата, ниту дека имале некаков контакт со ученици во тоа училиште.

– Во врска со дезинформациите за настан во училиштето во Велес, ја информираме јавноста дека по пријава на директорот на училиштето кој забележал невообичаена фреквенција на возрасни граѓани во околината на училиштето, полициски службеници излегле на лице место бидејќи тоа е нивна должност. Не се преземени никакви акттивности од страна на полицијата, ниту имало каков било контакт со ученици.

Овој инцидент ја зовре атмосферата на социјалните мрежи каде жестоко се дебатира за случајот со исфрлено дете од училиште во Велес поради непримена вакцина.