„Нетфликс“ ќе ја објави новата документарна серија посветена на Шон „Диди“ Комбс на 2 декември, но најголемиот шок кај публиката не ја предизвика содржината, туку името на извршниот продуцент: раперот Фифти сент.

Социјалните мрежи буквално „експлодираа“, а корисниците со иронија коментираат дека овој проект „докажува дека Фифти сент е најупорниот хејтер на сите времиња“.

Серијата со наслов „Шон Комбс: пресметката“ (Sean Combs: The Reckoning) донесува комплексен, суров и целосно документарен поглед на подемот и падот на мегаѕвездата Диди, чија кариера последната година е засенета од бројни обвиненија за сексуално насилство. Во четирите епизоди се користени судски документи, сведоштва од блиски извори и интервјуа со жени кои јавно проговорија за наводниот напаѓачки однос на раперот.

Режисерката Александрија Степлтон ја конципира серијата како „одбројување до конечниот пресмет“, а „Нетфликс“ ќе ги објави сите епизоди истовремено. Краткиот тизер веќе предизвика огромен интерес и коментари дека ова може да стане „најшокантниот музички документарец во историјата на платформата“.

Фактот дека извршен продуцент е токму Фифти сент, долгогодишен јавен критичар на Диди, го промени целиот наратив околу документарецот. Ривалството меѓу двајцата артисти трае со години: Фифти сент често го исмејува Комбс, алудира на скандали, објавува мемиња и коментари кои стануваат вирални.

Затоа, неговото учество во серијата многумина го нарекоа „врвна шаховска партија“.