„Нетфликс“ инспириран од драмата на Ѓоковиќ во Австралија: Наскоро следи документарен филм за српскиот тенисер!
Драмата која се случи околу пристигнувањето на Новак Ѓоковиќ во Австралија по повод Отвореното тениско првенство на Австралија ќе биде прикажана во документарен филм на Нетфликс, пренесува „Дејли мејл“.
Тоа ќе биде вид тениска верзија на документарниот серијал „Drive to Survive“. Наводно, филмската екипа веќе е во Австралија.
Серијата ќе ја снима лондонската „Box To Box Films“, а извршен продуцент ќе биде Џејмс Геј Рис. Странските медиуми велат дека филмската екипа ќе го следи тенискиот тим во текот на целата сезона и наводно ќе добие пристап до области како што се соблекувалните и салоните за играчи.
View this post on Instagram
Инаку, тенисерот Енди Мареј неодамна коментираше дека би било добро да се направи документарен филм за тенисот.
– Многу луѓе зборуваа за документарниот филм „Drive to Survive“. Гледав неколку епизоди, уживав. Такво нешто би било навистина добро за тенисот, изјави неодамна Енди за „Еуроспорт“.
„Drive to Survive“ е документарен серијал создаден во соработка со Нетфликс и Формула 1 за да овозможи задкулисен увид во возачите и трките на Светскиот шампионат во Формула 1.
View this post on Instagram
Така, документарен филм кој ќе прикаже досега невидени детали за драмата на Ѓоковиќ во Австралија, може да го популаризира тенисот како спорт.
За потсетување, на Ѓоковиќ, кој не беше вакциниран против коронавирусот, му беше укината визата набргу по слетувањето во Австралија. Ѓоковиќ вчера беше потврден на официјалната ждрепка за Отвореното тениско првенство на Австралија и покрај неизвесноста дали владата по вторпат ќе му ја укине визата.
View this post on Instagram
Австралискиот премиер Скот Морисон одби да го коментира визниот статус на Новак Ѓоковиќ, велејќи дека министерот за имиграција Алекс Хок треба да одлучи дали ќе го укине или не.
Тениската драма во Австралија резултираше со општо лудило на социјалните мрежи, особено на социјалната мрежа Твитер. За српскиот тенисер во последните пет дена на таа социјална мрежа се напишани околу 150 милиони објави.