Полицијата започна масовна потрага по 44-годишен маж во западно Токио, откако тој со чекан нападнал група средношколци, па со непозната течност ги испрскал полицајците кои пристигнале на местото на настанот, објави „Индепендент“.

Според Метрополитенската полиција на Токио, итниот повик бил примен околу 7:20 часот по локално време, при што било пријавено дека „маж со чекан напаѓа луѓе“ на улица во градот Фуса.

Осомничениот, идентификуван како 44-годишниот Терујуки Такабајаши, со чекан нападнал двајца ученици пред да се соочи со полицајците и да ги испрска со неидентификувана течност.

Во инцидентот се повредени вкупно пет луѓе, а еден ученик завршил со тешка повреда на левото око. Нападот се случил во мирна станбена населба, на околу 700 метри северозападно од железничката станица Фуса, што ги вознемири жителите за време на утринскиот шпиц.

Момче убило 89-годишен човек со чекан во Белград

Мајка му им рекла на тинејџерите да не прават бучава

Истражителите веруваат дека насилството било поттикнато од кратка вербална расправија непосредно пред нападот. Мајката на осомничениот наводно побарала од група од седуммина средношколци, кои биле собрани во близина на нивниот дом, да не прават бучава. Иако учениците се согласиле, тие не ја напуштиле локацијата. Набргу потоа, Такабајаши излегол со чекан и почнал да ги напаѓа.

Кога полицијата пристигнала, мажот се повлекол во својот дом и се забарикадирал внатре, притоа заканувајќи им се на полицајците со нож. Откако полицијата успеала безбедно да ја евакуира неговата мајка од куќата, осомничениот почнал да прска жолта течност кон нив од внатрешноста на објектот.

Полициските единици влегле во домот по четири и пол часа, но го затекле празен. На местото биле пронајдени неколку предмети што личат на чекани и на нож за преживување. Преку преглед на снимките од безбедносните камери, истражителите утврдиле дека осомничениот се извлекол низ задниот излез додека полицајците биле фокусирани на течноста што ја прскал од внатре.

Обид за убиство

Властите го третираат случајот како обид за убиство. Полицијата откри и дека Такабајаши веќе бил уапсен во октомври 2023 година под сомнение за обид за убиство во посебен инцидент, во кој наводно нападнал тинејџер со секира.

Во населбата сè уште е присутно силно полициско обезбедување додека потрагата по напаѓачот продолжува.

Иако Јапонија има строги закони за оружје и насилните криминали се ретки, во последните години се забележани неколку високопрофилни напади со ладно оружје.

Приведен гостиварец, се сомничи дека силувал малолетничка, па објавувал снимки на социјалните мрежи