Првиот тенисер на АТП ранг-листата е пријавен за настап на Мастерсот во Париз, но италијанскиот весник „Тутоспорт“ пишува дека Ѓоковиќ сериозно размислува да го прескокне завршниот Мастерс кој треба да се одржи во Торино.

„Тутоспорт“ неделава на насловната страница објави „Синер ќе игра на завршниот Мастерс“, а во текстот весникот пишува дека италијанскиот тенисер ќе настапи наместо Новак Ѓоковиќ.

Според „Тутоспорт“, Ѓоковиќ размислува по настапот во Париз да ја заврши сезоната и да ги наполни батериите за наредната сезона во која главна цел ќе биде да го собори рекордот по бројот на освоени грен слем титули, засега Новак, Рожер Федерер и Рафаел Надал имаат по 20 триумфи на најпрестижните тениски турнири.

Повеќе од еден месец се шпекулира за Ѓоковиќ и на кои турнири ќе настапи, а кои ќе ги пропушти. Новак одлучи да не игра на Мастерсот во Индијан Велс, се пријави за Мастерсот во Париз (1.11-7.11), а сега „Тутоспорт“ пишува дека српскиот тенисер нема да игра на последниот турнир годинава.