Глетката на возила што посипуваат сол по патиштата среде лето звучи необично, но токму тоа деновиве се случува во холандскиот град Хилверсум. Причината не е зимско невреме, туку екстремно високите температури кои можат да го загреат асфалтот на повеќе од 50 Целзиусови степени.

Градските власти применуваат влажен солен раствор за да го разладат коловозот и да спречат негово оштетување. Кога растворот ќе се распрсне врз жешкиот асфалт, влагата постепено испарува, со што ја намалува температурата на површината. Така асфалтот станува помалку леплив и се намалува ризикот од деформации предизвикани од сообраќајот.

„Ова го правиме за да ги разладиме патиштата“, објасни портпаролот на општината, Јерун Остерхерт.

„Станува збор за влажен солен раствор. Кога ќе го испрскаме врз асфалтот, влагата испарува. На тој начин асфалтот се лади, што спречува негово оштетување.“

Според него, за време на топлотните бранови асфалтот омекнува, особено на делниците кои цел ден се изложени на сонце, како и на крстосници и кружни текови каде што возилата често сопираат, свртуваат и повторно забрзуваат. Кога врз таква подлога поминуваат тешки возила, може да се создадат колотраги, а камчињата од асфалтот да почнат да се одвојуваат.

„На некои места што ги измеривме температурата надминуваше 50 степени. Жештината го омекнува асфалтот, а кога преку него минуваат тешки возила, се создаваат колотраги“, рече Остерхерт.

Тој додава дека токму на тој начин се спречува подоцнежно пукање на коловозот.

Иако многумина се изненадени што гледаат возила за посипување сол во лето, ова не е нова практика во Холандија. Сепак, некои општини се откажале од неа бидејќи солениот раствор што содржи хлориди може да има негативно влијание врз животната средина.

Слични мерки се применуваат и во други европски земји. Во Велика Британија, за време на топлотни бранови, по омекнатиот асфалт најчесто се посипуваат песок, камена или гранитна прашина за да го впијат омекнатиот битумен и да спречат тој да се лепи за гумите. На некои места, пак, патиштата се разладуваат со вода.

„Можете, на пример, да користите и песок. Можете и да прскате со вода – тоа го прават некои други општини. Но, тоа е краткорочно решение. Солта делува подолго, бидејќи е потребен најмалку еден ден за целата влага да испари“, заклучи Остерхерт.