Галичник и годинава беше домаќин на една од најпрепознатливите македонски културни манифестации – Галичката свадба, на која младенци беа Александар Пендароски (34) и Мартина Михајлова (30) од Скопје. Пред членовите на своите семејства, бројни гости и неколку стотини учесници облечени во автентични народни носии, тие го кажаа судбоносното „да“ во црквата „Св. Петар и Павле“.

Изборот на младоженецот има и силна симболика. Александар е со галичко потекло, а неговите родители биле првиот брачен пар на обновената Галичка свадба, која повторно почна да се одржува во 1991 година.

Дводневната манифестација започна со поставување и китење на свадбарскиот бајрак, по што следуваше традиционалното испукување на три пушки од домот на зетот. Во продолжение, семејството на младоженецот, придружувано од зурли и тапани, се упати кон селскиот мост, каде што свекрвата го поведе свекрвиното оро.

Пред селската чешма беа изведени и препознатливите „Невестинско“ и „Тешкото“, ора што претставуваат симбол на истрајноста, достоинството и непокорот. Првиот ден заврши со обичајот „одење по вода“, кога невестата, со покриено лице, придружувана од свадбарите, полни вода од три селски чешми.

Вториот ден започна со адетот „канење на мртвите“, при што младоженецот, заедно со свадбарите, ги посети гробовите на починатите во селото, а потоа се упатија во домот на кумот за официјално да го поканат на свадбата.

Следуваше традиционалното бричење на зетот, по што свадбарите заминаа по невестата. Таа, според вековниот обичај, од прозорецот преку прстен го погледна својот иден сопруг, изговарајќи ги зборовите: „Низ прстен те гледам, в срце да ти влезам“.

По дарувањето од свекрвата и традиционалното бакнување на нејзините раце од страна на невестата, беше изведен и обичајот на сеење брашно среде селото. Потоа Александар и Мартина се упатија кон храмот „Св. Петар и Павле“, каде што го склучија црковниот брак.

По венчавката, прославата продолжи низ улиците на Галичник со традиционални ора, зурли и тапани, со што уште еднаш беа оживеани богатите свадбени обичаи што повеќе од еден век претставуваат значаен дел од македонското нематеријално културно наследство. Завршницата на годинашната Галичка свадба ќе биде одбележана доцна вечерва, со последните свадбарски обичаи и свеченото затворање на манифеста