Италија го тестира роботот водич „Р1“ во музејот Палацо „Мадама“ во Торино, кој користи вештачка интелигенција за објаснување на уметнички дела и помагање во водењето на посетителите, со цел намалување на толпите и полесен пристап до изложбите, пренесуваат странските медиуми.

Роботот „Р1“ може да се движи на тркала со брзина до 1,5 метри во секунда и да дава објаснувања за изложените дела користејќи вградена вештачка интелигенција, помагајќи им на посетителите да се движат низ тесните ходници на историската зграда.

На посетителите им се достапни и дополнителни функции, вклучувајќи мултимедијална и интерактивна содржина за уметнички дела и историски контекст, подобра организација на движењето низ просторот, како и помош на лица со различни потреби при ориентација и обиколка на музејот.

Инженерите наведуваат дека роботот користи сензори и камери за да избегне пречки и да ја прилагоди рутата во реално време, како и да може да го „преориентира“ и премапира просторот за време на движењето.

Управата на музејот истакнува дека роботот треба да биде поддршка за вработените, а не нивна замена, особено во периоди кога бројот на посетители може да се зголеми до 30 проценти.

Според првите реакции, повеќе од 80 проценти од корисниците имале позитивно искуство, иако некои посетители сè уште претпочитаат човечки водичи за подетални објаснувања и не се сигурни како да ја користат новата технологија.

Проектот беше лансиран пред околу шест недели, кон крајот на март, со финансиска поддршка од Европската Унија од четири милиони евра преку програмата „Дигитална Европа“.