Списанието „Ауто експрес“ побара од 6.000 свои читатели да го именуваат најкул автомобилот во светот, а победникот може да ве изненади – не станува збор за Ферари, Мекларен или Ролс-Ројс, а може да се купи за само околу 3.850 фунти, пишува „Мирор“.

Поимот „кул“ е целосно субјективен – она што за некого претставува врв на стил, за друг може да биде безначајно. Сепак, тоа не ги спречило љубителите на автомобили да се обидат да го изберат најкул автомобилот на сите времиња, дебата која е подеднакво интересна колку што е и спорна. Со повеќе од 120 години автомобилска историја и илјадници модели за разгледување, „Ауто експрес“ го постави прашањето пред своите 6.000 читатели со цел еднаш засекогаш да се добие одговор.

На првото место се најде автомобил кој се појавувал на големото платно, меѓу другото и во филмот „Гатака“ (Gattaca) со Итан Хок и Ума Турман, а може да се набави по изненадувачки пристапна цена, во зависност од неговата состојба. Станува збор за Цитроен ДС (Citroën DS).

Пренесувајќи ги резултатите од анкетата, Сем Нејлор напиша: „Според нашите читатели, ако постои еден автомобил што е апсолутно олицетворение на стилот, тоа е Цитроен ДС.

„Не е најбрзиот ниту најексклузивниот автомобил на нашата листа, но дефинитивно се издвојува со стилот и со паметните инженерски решенија, додека името ДС е игра на зборови од францускиот збор за божица.

„Лесно можете да го замислите како тивко лебди низ Париз, долж Јелисејските полиња и околу Триумфалната капија, пред да застане пред некое кафуле во градот.“

Додека некои автомобили од листата достигнуваат вртоглави цени, пребарување на специјализирани страници за купување возила покажува дека Цитроен ДС може да се најде за само 3.850 фунти. Сепак, за оние со подлабок џеб, примероци во Обединетото Кралство достигнуваат цена и над 100.000 фунти.

Рангирањето на читателите доаѓа во клучен момент за автомобилската индустрија, која се соочува со прашањето во кој правец да се развива. Пред конфликтот во Иран, интересот за електричните автомобили стагнираше, а потоа нагло порасна поради зголемувањето на цените на горивата. Но, доколку ситуацијата повторно се стабилизира, се поставува прашањето каква ќе биде следната стратегија на производителите.

Една од можностите е развој на алтернативни горива – не електрична енергија, туку опции како синтетички горива и таканаречени е-горива. Додека синтетичките горива содржат дел природни компоненти, е-горивата се создаваат со помош на вештачки произведени јаглеводороди.

Поедноставено кажано, одредени алтернативни горива не ослободуваат дополнителен јаглерод диоксид во атмосферата, односно се климатски неутрални.

Во некои случаи, бензинските возила можат да ги користат овие горива без никакви измени, додека во други се потребни мали прилагодувања.

Со оглед на тоа што секторот е поделен околу идната насока, дел од експертите сметаат дека синтетичките горива би можеле да бидат решение за зачувување на класичните автомобили, како Цитроен ДС, на патиштата.

Во напис за списанието „Кар магазин“, новинарот Грејем Кинг истакна дека технологијата веќе се развива, но дека главен проблем останува високата цена.

Тој заклучи: „Е-горивата се исто така многу скапи… Цената со текот на времето ќе се намалува, но малку е веројатно дека некогаш ќе падне под околу 2 фунти по литар, што би ги направило одржлива замена за бензинот и дизелот за сите возила.

„Но, е-горивата и синтетичките горива ќе имаат клучна улога во одржувањето на интересните, стари автомобили во функција со децении, па дури и векови откако бензинот и дизелот повеќе нема да бидат достапни.“